Upten dach van huydent als den 19e dach in meij int jaer onsheren duysent vijfhondert ende drie. Soe zijn vergadert geweest ter eeren
Gods ende alle godsheiligen Augustin van Teylingen mit zijne vrinden ende maegen an die een zijde ende Joost Jansdochter mit haer vader
Moeder ende andere vrinden ende maegen ter anderen. Ende hebben geaccordeert ende geslooten gehadt een zeker huwelijck tuysschen den voirscreven
Augustin ende Joost Jansdochter voirscreven. In deser voirwaerden ende manieren hier naer verclaert inden eersten dat de vorscreven Augustin inbringen
Sal te huwelijck mit zijn voirscreven huysvrauwe een stucke lants bij hem onlancx gecoft van eenen genoomt Gerijt Zijgrijps Rommerszoon
Geheeten Die Ven tooste groot achthalve geers of dairomtrent geldende sestien rinsgulden tstuck tot 20 stuvers tsiaers ende is tselve lant
Gelegen tot Waermenhuysen daer lendens of zijn Jan Michielszoon ande noortzijde Jan Heynes ande westzijde ende Scelte Janszoon ande
Zuijtsijde. Item soe sal noch de voirscreven Augustin inbringen eenen brieff sprekende van vier Rinsgulden tsiaers terlosse den pennync sestien
Bij hem gecoft van Jan Symenszoon van Waermenhuysen ende daer van hij versekert is up een stucke lants die de vorscreven Jan Symenszoon liggende
Heeft in den banne van Waermenhuys vorscreven geheeten Maurijs ven groot wesende omtrent ses geersen jaerlijcx gelden 14 Rinsgulden
Daer lendens off zijn Gerijt Odis ande oistzijde ende Claes Symenszoon ande westzijde noch sal de voirscreven Augustin inbrengen 47
Rinsgulden 7 scindt ende een oort tsuck tot 20st achterstals die hem tgemeen lant van Hollant sculdich is van wegen Jan
Henrijcxzoon van Haerlem, daer hij transport of heeft om de selve so(m)men te ontfangen. In achtien toecom(m)ende jaeren uut tquaertier van
Vrieslant bij ghelijcke portie alle jaar 52 ½ sts en een doeit. Item soe sal de Augustin noch inbringen die costene van Mazelant
In Delflant die mijnen heer de stadhouder hem onlanx gegeven heeft geldende jaerlijcx omtrent 24 der selver
Rinsgulden noch zoe sal hij inbringen die costerie van onderkerspel bij den grave van Egmont hem gegeven geldende 30st stuvers siaers
Item sal de vorscreven Jan Gezijts hier tegens geven mit Joost zijn dochter vorscreven te huwelijk die som(m)e van 600 rinsgulden tstuck
Tot 20 stuvers munte van deser ordonnan(tien) vanden prince ende die gehoud(en) wesen te betalen een gerechte derdendeel gereet dat ander
Derdendeel up lichtmisse eerstcomende ende dat leste derdendeel up Sint-Jacobs dach dair an volgen telcke. In munte als boven
Item zoe en sal de vorscreven Joost Jansdochter niet incommen om eenige erfenisse van haer ouders te ontfangen dan ter lester
Doot van vader ende moeder item indien Joost Jansdochter oflivich wort zonder bliven blijckende geboorte achter te laeten
Zoe is bevoirwort dat een ijgelijcke mit zijne goed af sal staen welverstaen gewijn ende verlies half ende half ende indien zij
Beiden kint of kinderen achterlieten ende die na doot van eenich van hem beiden storven zoe sal die erffenisse gaen na scependoms
Recht van zuythollant. Item zoe is voert bevoorwort indien Augustin oflivich wort voirde voirscreven Joost zijn huysvrauwe zonder
Blijven blijckende geboorte bij haer gewonen achter te laeten dat indien gevalle de voirscreven Joost hebben ende voer uut nemen
Sal uuten gecofte goeden die de vorscreven Augustin achterlaeten sal die somme van 200 der voirscreven Rinsgulden. Item
Cleynodien cleederen elx tot hoer live behoerende zullen nemen die gerechte erfgenamen. Item is voert versprocken ende
Bevorwaert dat de voirscreven Jan Gerijtszoon vader van de vorscreven Joost sal moegen disponeren ende geven(geuen) zijn huys ende huyszaet
Dat hij nu t Alcmaer heeft ende mitter doot ruymen sal een van zijne kinderen wie dat hem believen sal zonder dat den
Geene die hijt geeft of geven sal dat gehouden sal wesen weder in deelinge te bringen daer sulver noch goudt inne
Gekent en sal wes alle dunck sonder arch ofte lijste. Ende in kenisse der waerheit zoe hebben de vorscreven Jan Gerijts
Ende Augustin elcx huren handteycke hier onder gestelt ten daege vorscreven. Ende omme der meerder sekerheitswille zo
Hebben de voirscreven Jan Gerijtszoon ende Augustin gebeden die eersamen Willem van Riedwijk ende Gerijt Pieterszoon mannen
Der graefflijckheit van Hollant dese contracten ende huwelijcxe voirwaerd(en) die twee zijn van worde te worde sprekende
Daer van zij elcx een tot hem genomen hebben over hemluyden te willen besegelen twelck (niet zichtbaar) Willem van Riedwijc
ende Gerijt Pieterszoon mannen der Graeflijcheit van Hollant vorscreven gerne gedaen en onse segelen elcx bysonderen hier onder an gehangen hebben upten dach ende int jaer als boven
Jan Gerytszoon A. Teylingen
Contractelickheit van hollant voirscreven
